I cinch regole per scriver in lombard

Debon per scriver in lombard l’è assee savé apena cinch regole? Sì! L’è propi inscì!

La o e la u

In lombard [o], [ɔ] e [u] inn squas semper allofon, cioè se poden doperà tut e tri senza cambià el significad de la parolla (es: [kan’son], [kan’sɔn], [kan’sun], …). Per quell motiv chì, l’è pussee prategh doperà domà un grafema per tucc e tri i fonema (“canzon”) e poeu ognidun el parnonziarà segond la soa variant. Inscì l’è liber el grafema <u>, che el sarà ciapad de [y] (el son de la “ü”). A quell pont chì, el gh’ha minga trop sens doperà <ö>: donca doperarem <oeu>. Quej scernid chì inn scompartid con la grafia milanesa e donca inn tacad a una tradizzion. Dessorapù, inn pussee prategh per la scritura al computer, senza di diacritegh dificil de scriver con la tastera italiana.

Z e S: quand che inn do?

I letere <s> e <z> nella NOL inn paralei, anca per i rispetiv digraf <ss> e <zz>:

• <s> la gh’ha valor de [s] al principi de parolla (sabet) e de [z] in posizzion intravocalega o a la fin de parolla (roeusa);
• <ss> la gh’ha semper valor de [s] (ross);
• <z> la gh’ha valor de [s] o [t͡s] al principi de parolla (zuca) e di [z] o [d͡z] in posizzion intravocalega o a la fin de parolla (ghez);
• <zz> la gh’ha semper valor de [s] o [t͡s] (mazzà).

La quistion di “dobie”

I consonant dobie in la NOL marchen el slongàss de la vocal denanz a la consonant e in particolar inn:

• <ll> (es: pell vs. pel);

• <nn> (es: sann vs. san);

• <rr> (es: carr vs. car).

Alter cas de dobie inn motivad con l’etimologia (tardo lat. cornacŭla > lom. cornaggia) o de analogia in tra derivad (vegg > veggia).

Un zich de etimologia

Al doperà la NOL, besogna andà adree anca a di regole etimologeghe:

• ai parolle che in di varietà ocidentai finissen in “oeu”, se sgionta una “l” (pedrioeul, fioeul, …), che se troeuva anca in di derivad de tute i varietà (fioeul > fiolin);
• i parolle che in di varietà orientai perden la “v” intravocalica e la “n” prima de consonant, i tegnen, desgià che inn present in tut i derivad (vin > vinaja);
• i parolle che in di varietà ocidentai finissen in “e” longa, se scriven con “er”, desgià che l’è present in tut i so derivad (becher > bechera);
• in la pupart di varietà lombarde, gh’è quater coniugazzion verbai: -à(r), -è(r) , -er/ø, -ì. Per i varietà che gh’hann la terza coniugazzion senza desinenza, se scriv istess “-er” (*scriv > scriver).

El plural e el participi

• Per el participi se doperen i forme in “-d” anca quand che inn no parnonziade in de la propia varietà (parlà > parlad [par’la:, par’lat, par’lad]) foeura che per i verb monosillabegh e per el verb vesser che se poeu doperà anca la forma “-ait” in di dialet che la doperen (fà > fad [fa:, fat, fad] / fait [‘fai, ‘fait]).
• Per el plural feminil di parolle che finissen in -a, se dopera la -e anca se l’è minga parnonziada (dona > done [dɔn, ‘dɔne]).
• Per el plural maschil di parolle che finissen in -d/-t, se poeu doperà anca la forma in -cc: (gat > gat / gacc).

Fèm un poo de repass?