La grafia per la lengua lombarda
La NOL l’è stada desvilupada per permeter a tuta la lombardofonia de scriver cont una grafia unega ma respetosa de la tradizzion grafega de la lengua.
Puoi leggere questa pagina in italiano cliccando qui.
Grafia comuna
Una grafia comuna l’è vun di pass pussee important per salvà el lombard in d’un mond che dovra la scritura ‘me vun di principal mez de comunicazzion. Compagn de ogni lengua, el lombard el gh’ha tante variant diatopeghe, ma i so diferenze inn pussee marcade che quei di lengov oficiai, soratut perchè i gh’hann mai havud un standard comun. Una grafia unitaria a l’è necessaria per schivà una “Babel” di ortografie con soluzzion diverse, despess voeuna contra l’oltra e incoerente in tra de lore.
Inovazzion e tradizzion
La Noeuva Ortografia Lombarda la se fonda in su la tradizzion grafega lombarda. La bas de partenza inn i grafie tradizionai lombarde. De queste chì s’è desvilupada una grafia noeuva con trat marcad pussee polinomegh, e s’inn ranzade e sostituide carateristeghe superflue o minga necessarie. Desorapù, la grafia NOL l’è una grafia che l’è fazzil de scriver cont i tastere italiane del dì d’incoeu.
Flessibilità
La NOL a l’è una grafia che la se adata ai situazzion di parlant e che la da la possibilità de scriver in de l’istessa manera a tucc, ma anca in manera diversa se gh’è besogn de fàll in d’un determinad contest. Per quell motiv chì, la tendenza la sarà vers la flessibilità, senza sgiontà tut in d’una unega e monolitega koinè ortografega. La NOL la met minga un standard de gramatega: el “gat” el sarà semper, al plural, “gat” a Milan e “gacc” a Berghem.
Nancamò convinciud? Alora varda và inanz a lensger!
Perchè scernì la NOL?
L’è pensada per el lombard
A diferenza di alter grafie che despess inn pensade domà per un dialet, la NOL l’è stada pensada per el lombard intregh fina del prim moment e donca l’è fonzional a ogni varietà lombarda.
La se imprend in poch
Per quei che cognoss sgiamò un dialet lombard, a l’è propi ladin imprender a doperà la NOL grazzie a la so logicità e a la so ispirazzion ai meder classegh de la leteradura. Per quei che voeul imprender el lombard, a l’è un suport per fàss capì e per capì mei i olter parlant.
L’è minga invasiva
La grafia NOL la gh’ha vari nivei de standardizazzion che se poden scernì: la polinomia a l’è un pont de forza, mìa de imposizzion.
‘Se fom? Scominciom?
Lènsg i cinch regole
I cinch regole permeten de scriver la pupart di test in lombard in d’una manera logega, coerenta e standardizada.
Dopera i nost resorse
In di noster resorse gh’è el liber per scriver con la NOL, i sussidi didategh e anca el dizzionari!